1Ki 16 | NdeIBE | STEP | Ilizwi likaJehova leza kuJehu indodana kaHanani lisongela uBhahasha lisithi:

1 Kings 16

1 Ilizwi likaJehova leza kuJehu indodana kaHanani lisongela uBhahasha lisithi:

2 “Ngakususa othulini ngakwenza umkhokheli wabantu bami bako-Israyeli, kodwa wasuka wahamba ngezindlela zikaJerobhowami njalo wabangela abantu bami bako-Israyeli ukuthi bone bangithukuthelise ngezono zabo. 3 Ngakho sekufanele ngichithe uBhahasha labendlu yakhe, njalo indlu yakho ngizakwenza ifanane leka-Jerobhowami indodana kaNebhathi.

4 Bazadliwa yizinja abangabakaBhahasha abazafela edolobheni, kanti izinyoni zasemoyeni zizakudla labo abazafela emmangweni.”

5 Okunye okumayelana lombuso ka-Bhahasha, akwenzayo lokuphumelela kwakhe, akulotshwanga yini egwaleni lwembali yamakhosi ako-Israyeli? 6 UBhahasha waphumula laboyise wembelwa eThiriza. Kwathi u-Ela indodana yakhe yathatha ubukhosi yabusa.

7 Njalo ilizwi lafika livela kuJehova ngoJehu indodana kaHanani lisiya kuBhahasha labendlu yakhe, ngoba kulezono ezinengi ayezenzile emehlweni kaJehova, wamthukuthelisa ngezinto abazenzayo, waze wafanana labendlu ka-Jerobhowami – kanye lokuthi wayichitha.

U-Ela iNkosi yako-Israyeli

8 Ngomnyaka wamatshumi amabili lesithupha wokubusa kuka-Asa inkosi yakoJuda, u-Ela indodana kaBhahasha waba yinkosi yako-Israyeli njalo wabusa eThiriza okweminyaka emibili.

9 UZimiri, esinye sezikhulu zakhe, owayelawula ingxenye yezinqola zempi, waceba ukumbulala. U-Ela wayeseThiriza ngalesosikhathi, esidla edakwa endlini ka-Ariza, indoda eyayiphethe isigodlo saseThiriza. 10 UZimiri wangena, wamtshaya wambulala. Kwakungumnyaka wamatshumi amabili lesikhombisa wokubusa kuka-Asa inkosi yakoJuda. Wasethatha isikhundla sakhe sobukhosi waba yinkosi.

11 Uthe eqalisa ukubusa esehlezi esihlalweni sobukhosi, wabulala bonke abendlu kaBhahasha. Katshiyanga ndoda noma kuyisihlobo loba kungumngane. 12 Ngakho uZimiri wabhubhisa bonke abendlu kaBhahasha, kwaba njengokwatshiwo nguJehova owasongela uBhahasha ngomprofethi uJehu – 13 ngenxa yazo zonke izono azenzayo uBhahasha lendodana yakhe u-Ela; benza lo-Israyeli wona kwaze kwaqubula uJehova uNkulunkulu ka-Israyeli wazonda ngenxa yezithombe zabo zeze.

14 Ezinye izehlakalo ngombuso ka-Ela, lakho konke akwenzayo, akulotshwanga yini encwadini yembali yamakhosi ako-Israyeli?

UZimiri iNkosi yako-Israyeli

15 Ngomnyaka wamatshumi amabili lesikhombisa wokubusa kuka-Asa inkosi yakoJuda, uZimiri wabusa eThiriza okwensuku eziyisikhombisa. Ibutho lalisenkambeni yaseGibhethoni, idolobho lamaFilisti. 16 Abako-Israyeli bathi sebezwile ukuthi uZimiri wakha icebo lokubulala inkosi lakanye wayibulala, babeka u-Omiri, umlawuli webutho wahle waba yinkosi yako-Israyeli mhlalokho enkambeni.

17 U-Omiri labo bonke abako-Israyeli bahlehla basuka eGibhethoni bayavimbezela iThiriza. 18 UZimiri uthe ebona ukuthi idolobho laselithethwe, waya endaweni evikelekileyo wathungela isigodlo sesikhosini ngomlilo lapho ayekhona. Ngakho wafa, 19 ngenxa yezono ayezidalile, esenza okubi phambi kukaJehova njalo kwakungaselamuntu ohamba ngendlela zikaJerobhowami lasezonweni ayengene kuzo lalezo ayebangela u-Israyeli ukuba azenze.

20 Ezinye izehlakalo zokubusa kukaZimiri, lomvukela ayewenzile, akulotshwanga na ogwaleni lwembali yamakhosi ako-Israyeli?

U-Omiri iNkosi yako-Israyeli

21 Kwaba khona ukudabukana phakathi kwabantu bako-Israyeli, abanye babesekela uThibhini indodana kaGinathi ukuthi abe yinkosi, abanye besekela u-Omiri. 22 Kodwa-ke kwaba sobala ukuthi abalandeli baka-Omiri bayabakhulela abakaThibhini indodana kaGinathi. Ngakho uThibhini wafa u-Omiri waba yinkosi. 23 Ngomnyaka wamatshumi amathathu lanye ka-Asa inkosi yakoJuda, u-Omiri waba yinkosi yako-Israyeli, wabusa okweminyaka elitshumi lambili, eyisithupha yayo eseThiriza.

24 Wathenga uqaqa lwaseSamariya kuShemeri ngamathalenta amabili esiliva njalo wakha idolobho phezu koqaqa lolo walibiza ngokuthi Samariya, elubiza ngoShemeri, owayekade engumnikazi walo.

25 Kodwa u-Omiri wona waba lezono phambi kukaJehova, njalo yena wona okwedlula bonke abamandulelayo. 26 Wahamba ngazo zonke izindlela zikaJerobhowami indodana kaNebhathi kanye lasezonweni zakhe, abangela ukuthi u-Israyeli azenze, ngalokho baqubula uJehova, uNkulunkulu ka-Israyeli, wazonda ngenxa yezithombe zabo eziyize.

27 Okwembali yokubusa kuka-Omiri, akwenzayo kanye layephumelele kukho, akulotshwanga na ogwaleni lwembali yamakhosi ako-Israyeli? 28 U-Omiri waphumula kuboyise wembelwa eSamariya. Kwathi u-Ahabi indodana yakhe wabusa ngemva kwakhe.

U-Ahabi Uba yiNkosi yako-Israyeli

29 Ngomnyaka wamatshumi amathathu lafica mibili wokubusa kuka-Asa inkosi yakoJuda, u-Ahabi indodana ka-Omiri waba yinkosi yako-Israyeli, njalo wabusa eSamariya kwabako-Israyeli okweminyaka engamatshumi amabili lambili. 30 U-Ahabi indodana ka-Omiri waba lezono ezingaphezu kwalabo abamandulelayo phambi kukaJehova. 31 Kwathi lanxa ebona kungasilutho ukungena ebubini bukaJerobhowami indodana kaNebhathi, wathatha uJezebeli indodakazi ka-Ethabhahali inkosi yamaSidoni, waseqalisa ukukhonza lokusebenzela uBhali. 32 Wakhela uBhali ialithare ethempelini likaBhali ayelakhe eSamariya.

33 U-Ahabi wenzela u-Ashera insika njalo kunengi akwenzayo okwathukuthelisa uJehova, uNkulunkulu ka-Israyeli, okwedlula wonke amakhosi ako-Israyeli amandulelayo.

34 Ngezinsuku zika-Ahabi uHiyeli waseBhetheli wakha kutsha iJerikho. Ukubekwa kwezisekelo zayo kwathatha impilo yezibulo lakhe u-Abhiramu kwathi lasekumiseni amasango alo kwathatha impilo yecinathunjana lakhe uSegubi, kwagcwaliseka ilizwi likaJehova ayelikhulume ngoJoshuwa indodana kaNuni.